Ҳаётингизни нималарсиз тасаввур қилолмайсиз?

Ҳаётимизнинг ажралмас қисмига айланган жуда кўп нарсалар бор, баъзан бизга уларсиз яшаб бўлмайдигандек туюлади. Кимдир телефонидан ажрала олмайди, бошқа биров эса телевизор кўрмаса зерикиб қолади.

Гулнора АБДИЕВА, шифокор: — Тўғри, кундалик турмушимизда ишлатадиган жуда зарур буюмлар бор, бироқ уларнинг ҳеч бири ҳаётимиз мазмунига айланмаган, менимча. Гарчи бироз қийин бўлса-да, ўша нарсаларсиз ҳам ҳаётимиз давом этаверади деб ўйлайман.

Қаҳрамон ТЎЛАХЎЖАЕВ, талаба: — Тўғриси, телефонсиз яшолмасам керак. Уни ҳар доим ёнимда олиб юраман, ухлашдан олдин ёстиғимнинг остига қўйиб қўяман. Телефонга жуда боғланиб қолганман.

Ҳилола ШЕРМУҲАММЕДОВА, тарбиячи: — Менимча, ҳозирги турмушни жуда кўп нарсаларсиз тасаввур қилиб бўлмайди: совуткич, телефон, телевизор. Биз буларга ниҳоятда ўрганиб қолганмиз. Энди уларсиз яшашимиз қийинроқ бўлса керак.

Тоҳиржон ЗОИРОВ, ҳайдовчи: — Касбим доирасида айтадиган бўлсам, ҳаётни энди автомобилларсиз тасаввур қилиб бўлмаса керак. Ахир ҳозирги тезкор замонда автомобилларнинг бўлмаслиги умуман тасаввурга сиғмайди.

Қурбонали ХАЙРИДДИНОВ, тадбиркор: — Ҳозирда ҳаётимни телефонсиз, замонавий қулайликларсиз ва яна жуда кўп нарсаларсиз тасаввур қилолмайман. Ишончим комилки, қулайликлар янада кўпаяди, чунки замон шиддат билан ривожланяпти.

Алия БЕРДИМУРОДОВА, менежер: — Ҳаётимизда бизга ҳамроҳ бўлаётган ҳамма нарсалар зарур деб ўйлайман. Масалан, оддий қўл телефонини олинг. Усиз ҳозир иш битиришимиз қийин: телефонга жуда ўрганиб қолганмиз.

СЕВДОРА тайёрлади.