Тамакининг “фойда”си

Савдогарлар бозорга биринчи марта тамаки олиб келишганида бир донишманд одамларга қарата:

- Тамаки соғлиқ учун кони зарар - чека кўрманг, - деган экан, ҳеч ким қайрилиб қарамай, тамакининг бозори касод бўлибди. Бундан норози бўлган савдогарлар донишманднинг ҳузурига бориб, ўз фикрини ўзгартиришини илтимос қилишибди.

Шунда донишманд одамлар олдига чиқиб:

- Халойиқ! Тамаки чекканларни ит қопмайди, уларнинг уйига ўғри тушмайди, кашанда сира қаримайди, дебди.

Одамлар ҳайрон бўлиб сўрашибди:

- Бу қанақаси? Аввал тамаки кони зарар – зинҳор чека кўрманг! – деб огоҳлантирган эдингиз. Энди бунинг аксини айтяпсиз.

Донишманд ўз фикрларини шундай изоҳлабди:

- Тамаки чеккан киши ҳассага таяниб қолади – ҳассали кишига ит яқинлашмайди. Кашанда туни билан йўталиб чиқади – уй эгаси ухламаган экан, деб ўғрилар қайтиб кетади. Чекувчи кишига кўпинча бахтли кексалик гаштини суриш насиб этмайди – у ёш ўлиб кетади.

“Оила тақвими”дан