Яримта йўтал

Подшо Афандини мот қилолмай армонда юрар эди. Ниҳоят, бир куни вазирларни тўплаб:

— Кимки Афандини мот қилса, унга мамлакатнинг ярим хирожини бераман, — деди.

Вазирлар уч кечаю уч кундуз кенгашиб, мот қилиш йўлини топишибди. Афандини подшонинг ҳузурига чақиришиб:

— Афанди, бизга яримта йўтал керак бўлиб қолди, ҳозир яримта йўталиб берасиз, — дейишибди.

Афанди ҳеч ўйлаб ўтирмасдан дастурхондаги ҳолва кесадиган пичоқни олиб тиғини оғзига қўйди-ю, қаттиқ йўталиб:

— Тақсирлар, хоҳласаларинг бу ёғини олинглар, хоҳласаларинг, у ёғини, — деди.