Биз ҳеч киммиз бир-биримизга

Биз ҳеч киммиз бир-биримизга,

Ўртамизда йўқ эрур ришта.

Муҳаббатни дил тўримизга

Ўтказмаймиз ҳаттоки тушда.

Биз ҳеч киммиз бир-биримизга,

Учрашувлар — қисмат хатоси.

Бизнинг чалкаш тақдиримизга

Чизилмаган ишқнинг дунёси.

Биз ҳеч киммиз бир-биримизга,

Йўлларимиз бўлмайди туташ.

Ачингандек ғуруримизга,

Хаёлда ҳам келмаймиз тўқнаш.

Биз ҳеч киммиз бир-биримизга,

Биз шунчаки... шунчаки таниш.

Бу учрашув тақдиримизга

Битилмишдир шунчаки янглиш...

(с) Комила НОСИРОВА